PARAGLIDING kahun ya fir PUNARJANM...

Mere yaar ki shaadi thi Palampur main. Hum invited they.. so chal diye..Kapde Darzi ne sile nahin naye..to humne bhi jugaad kia or ek shirt khareedi or papa ka blazer uthaya... bus chal diye fir.. Bhagwan bhala kare is Fashion naam ki chidiya ka, kuch bhi daal leta hun... Photo dekh lena baad main..

To raat main papa ne dost ke yahan drop kia.. Palampur pohonchne ke do intezaam kiye gaye the.. Train or Bus.. Humne socha apne miton ke saath bus se jayenge..Par DULHE RAJA ka phone aaya or aen mouke pe unhone orders diye ke Train main kood pado..wahan uske office friends they.. Arrey yahan ye bata dun..ke hum dulhe raja ke bachpan ke dost hain. Khair usne kaha or hum chale gaye..Ek taxi intezaar kar rahi thi humara..kuch naye log they kuch purane..hum station pahunche..Purani dilli... whan par or bhi log mile... Itni der main..humne naamkaran sanskar shuru kar diye...Aadatan... Ek dost jo saari zimmedaari uthaye hue tha..logon ko wahan tak pahunchane ki..wo ho gaya..MUNSHI.. uska saathi...MUHAR.. to wahan jakar pata chala ke YATRIYON ko do trains main jana hai... Ek UNA jayegi or DOOSRI PATHANKOT.. kahir hum MUNSHI ji ki meharbani se..kuch aur doston ke sath Pathankot wali train main PIL liye..

Wahan jaan pehchan hui.. to laga ke jaise main kisi IT company par story bana raha hun.. Main hi ek ODD ONE OUT tha..lekin ladke achche nikale or..unhone mujh gareeb ko bhi apne saath vartalaap karne ka mauka diya... ye jaankar AASHCHARYA hua.. ke IT wale log hindi ke KATHINTAM sabdon ka proyaog kar rahe the... laga ke hindi ke vilupt hone ka darr bewajah hi humare man main hai..or maine man hi man apne aap ko KOOP MANDOOK..bhi keh daala..kahir..FAST FORWARD chalte hain.. Pathankot se taxi pakdi..Pahunce PALAMPUR..hotel TEA BUD...wahan fresh hue..nashta kia..

Announcement hui ke Formals din main hi pehen lain..to thode bohot vichar vimarsh ke baad.. hum sabne Formals daal liye.. Bheem ne shave bana li..or Hidimba sa dikhne laga.. oh aap soch rahe honge ..ye bheem kaun hai.. kuch or naamkaran hue.. Nitin Sharma..BHEEM...Sumit Agaria..Angara... or Sandeepan Sharma.. Sandy... hum sab tayaar hue.. humne apne JUGAAD pehne.. or chal diye..

Shadi main shaamli hone ke baad hume pata chala ke...TRAIN mian aana Blessing in disguise nikla.. Bus 17 ghante baad.. shamm 4:30 par pahunchi.. BACH GAYE.. mujhe waise bhi bus ka safar nahin suhata..

Agle din Ankush (DULHE) ne sab doston ke liye Para-Gliding kee vyawastha kari hui thi. Subah hum sab tayaar hokar chal diye BILLING kee taraf... YAHIN hoti hai Para-Gliding.. pahunchte hi.. naam likhe gaye.. itne main humen dekha ke ek Glider humari hi taraf aa raha tha.. uski Landing ke baad hume pata chala ke wo ek FIRANGI MAHILA thi.. use karta dekh thoda haunsla mila.. akele hi uda ke le aayi thi wo apna udankhatola... Meri bhi Mardangi..ne man hi man kaha..tu to bewajah hi dar raha tha.. jab ye kar sakti hai..to tu to ..aaram se kar lega.. fir pata chala ke hum to udaenge bhi khud nahin..koi or udaega..hum sirf saath main baithenge... MAMLA AUR AASAN HO GAYA..

Doosri khep main humari baari aayi aur upar jane ki... tab tak to kai landing dekh chuka tha main.. aur haunsla 98% tak pahunch huka tha...Ab bus main thuns kar hum bhi chal diye..TAKE-OFF karne ke liye... OOPAR pahunchne ka rasta sankara tha.. aur jaie hi bus ne hume khai ke divya darshan karaye...mera bechara dil sehem gaya....HONSLA -90% ho gaya.... laga ke isi bus se wapas ho lenge sharmaji.. Jaan hai to jahan hai..oopar pahunche to pahad ki choti par log tayaar the.. isse pehle ke main kuch mimiyata..ek launde typr PILOT ne mujhe chaant lia..kaha ke aap ye pehen lo.. bina koi pal gawanye usne pehna bhi diya helmet or saara tam jhaam.. muh gareeb BAKRE se keemat bhi nahin poochi or halaal karne ke liye maala bhi pehna di... idhar udhar mazak kar..main apna man halka karne ki koshish main laga tha.. ek Angar chand kood bhi gaye..pahad se neeche.. bus ye dekh ke mera dil baith gaya..or wahan maujood kuch ek logon se main apne dil ki haalat bayan kar dee. ACROPHOBIA..ke thode lakshan hain mujhme..

IS DABANGG ko Sonakshi ki tarah pyaar se dar nahin lagta ...par oonchai se lagta hai.... Man main ye khayal aaya...ke marne se achcha hai mana kar do..zinda rahe to fir milenge.. bohot se kaam hain jo sab nahin kar sakte.. SATAK lo.. dimaag ke nasen bhi zor daal rahi theen..ke heart attack bhi aa sakta hai.. chodd ye adventure... or patli gali pakad le.. thoda mazaak banega lekin..jaan to bachegi...

ITNI der main mere kasai ne aawaz lagai.. ke SIR aaiye.. mujhe laga ke KASAI ne kaha SIR LAIYE... chal diye hum bhi..man main MAHAKAL ka naam liye... usne apne ko mujhse baandha.. or kaha ke tayaar ho.. maine kaha ..koi instructions nahin doge.. to kaha bus zor se bhagna.. maine samne dekha.. or man hi man kaha... SALE bhagoon kahan.. 4 kadam baad to zameen khatam hai..pehle jab bhagte the to finish line dikhti thiu..yahan to FINISH hota deekh riya hai bawle... use mere kahyalon se kahan matlab tha.. beech main hi bol diya.. SIR BHAGO...mujhe SHOLE ka wo scene yaad aa gaya kasam se.. jab Hemaji ke peech gunde lage the.. or wo BASANTI se kheti hai.. " Bhaag DHANNO ..aaj teri Basani ki ijjat ka sawal hai.." fark sirf itna tha,.. ke aaj meri jaan par ban aayi thi.... bhage.. joota uske pair main fans gay..or take-off ruk gaya... mujhe laga ke flight cancel kar do bete.. ye APSHAKUN ho gaya hai.. bhagwan ne jeene ka ek aur mauka de diya hai..

fir mere kuch bolne se pehle zalim ne keh diya ..SIR BHAGO.. ye saala SIR shabd se nafrat si hone lagi mujhko... khair hum bhage.. or pahad khatm... pair fir bhe chal rahe the..lekin hawa main.. or hum UD LIYE.... kai foot neeche.. sirf ped or ghar cheentiyon jitne dikh rahe the.. maine man hi man socha..is khooni darinde se baat hi nahin karoonga.. Pilot.. is flight ka to koi license bhi nahin hota.. experience nahin poochunga.. warna kam hua to heart attack pakka..Yaar main to kaheen bhi bike par bhi baithta hun.. to bike maalik ko peeche baitha leta hu...yahan to wo bhi nahin kar sakta tha.. doosre.. wo saala nervous tha bhi ya nahin.. ye bhi nahin dikh raha tha.. wo peeche jo tha... thodi der main usi ne kaha.. SIR thoda peeche ho jaiye.. aaram se baithiye... maine socha aaram se... sale beech hawa main taang rakha hai.. keh raha hai aaram se baithiye.. dilli aaiyo tu.. tujhe ITO ka chauraha paar karne ko kahunga to pata chalega... khair... hawa ka ek thanda sa jhonka aaya.. or hum or oopar ho gaye.. sab ke sab..neeche ja rahe hain..bus ek mera hi VIMAAN NAYI BULANDIYON ko chune ko vyakul hai.. maar hi dalega aaj..AAdat se majboor maine bhi marte marte pooch hi lia... kahan rahte ho..usne kahan YAHIN.. Thakur hun... maine kaha ye maut se kyun khelte ho/.. USNE KAHA shauk hai sir.. bachpan se man tha...14 saal ki umra main.. khud hi plastic se baya the pehla glide... or usse uda.. fir ek angrez ne daya karke apne glide gift kar diya mujhe... tab se yahi karta hun.. maine aakhirkar wo khoni sawal pooch hi lia jiske liye mere dimaag ne hazaar baar mana kia tha... kitne saalon se ud rahe ho.. usne kaha.. 6 saal se.. ab to meri jan maion jaan aa gayi...  MAHAKAL ka shukria kia.. or safe landing taye ho gayi meri..thodi or baaten ki.. Tibaatiyon ke baare main...

baaten karte karte landing ka samay aa gaya... pair 90 degrees par rakhne ko kaha usne.. or hum land ho gaye.. JAAN BACH GAYI.. BHAGWAN KA SHUKRIA KIA.. or maine apni bahaduri par khud ko SHABBASI dee..or yaad aaya.. KE DAR KE AAGE JEET HAI... Thanks Ankush Rana... for a life time experience.. kyonki Shayad main khud kabhi PARAGLIDING nahin karta...