Idea KASHT-MAAR CARE

Abhishek bachchan sahab roz har cahnnel par chilla chilla ke jis tarah se Idea ke 3G ka prasar karte hain..usse to lagta hai ke SARKAR ko Pariwar Niyojan ke liye pehle hi IDEA ko god lekar 3G launch kar leni chahiye thi... aur kya... na koi jhanjhat na takleef bus ek IDEA ka 3G hi POPULATION EXPLOSION ke TIMER ko diffuse kar dega.. wah kya IDEA hai sirji...ho sakta hai kal ko 4G se POLLUTION bhi kam ho jaye..kuch din intezaar kar lena chahiye...

Walk and Talk se jab Pariwaar Kalyaan par aa hi gaye hain to kya pata agar humare hi saamne Bhagirath(ban kar Abhishek).. KAALI YAMUNA ko GANGA bana de... ek IDEA aapki..humari or poore BHAARAT ki zindagi badal sakta hai...lekin apni customer care nahin..


MUDDEY PE AATE HAIN... meri peeth peeche sazish karke mere pitaji ne mummy ke liye ek Prapaid or apne liye ek Postpaid Idea ka connection le liya...Kahin na kahin is decision main bhi WANSHWAD havi nazar aaya mujhe...Amitabh ki wajah se Abhishek ki credibility itni hai..ke aaj bhi log IDEA khareed rahe hain...

Mujhe to bas Idea sunkar hi dar lagta hai ab to...mere kanon ke rongte khade ho jate hain..or dimaag ki battiyan DISCO lights kee tarah jalne lagti hain..halanki unka matlab emergency siren hota hai... hey bhagwan de wardan...is Idea se bacha le jaan..


JAISA ki har bhartiya ki takdeer main hai..mere saath bhi hota hai..hum bharteeya pushtaine BHOLE hota hain...tabhi to koi bhi company apne LUBHAWNE discounts ke MAKADJAAL main aapko fans kar...aapka SOSHAN kar leti hai..or aap chatpata kar us company ko chod doosri MAKDI ko yani company ko pakad lete hain.. mer saath bhi kuch aisa hi hua...Aam AADMI ka mango shake nahin banta BABA..usko achche se daba kar choos kar..fir usko peeche se daba kar uski guthli nikal kar...uski guthli or chilke main bachi reshon main se meethapan apne daanton se ragad kar cheenne ke baad..use berehmi se polyethene main daal diya jaata hai..taki galati se use mitti na mile or uska dobara janm na ho....

Maine MTS ka broadband liya..bade hi lubhawne rates main..mujhe laga ke main duniya main sabse sastaa..sundar or tez wireless broadband khareed liya hai..3 mahine ka unlimited usage or USB dongle sirf 2000 main.. jaise hi suna maine bhi apni GAREEB GANIT lagayi...or jaise hi mera jama ghata barabar FAYDA nikla..maine lapak ke phone milaya..ek MTS ke bichauliya ne..aake gyan pilaya..dongle thamai....MERI GAADHI KAMAYEE ko apni jeb main khees kar mujhe WORLD CUP JEETNE ki khushi mian badhayi di..or chal diya..maine bhi use kiya dabake MTS..jabardast laga mujhe... lekin bhaiya....SAAMAAN kisi bhi company ka lo...hota wo SHAADI ki tarah hi hai... HONEYMOON ke baad... ghar lauttey hi aate-daal ke fer main padna hi padta hai.. hua wohi MERA bhi HMT yani HONEY MOON TIME khatm hua..or recharge karane pahuncha... to maine apni 3 mahine ki ausat usage ke hisab se ek sasta SAUDA dkekha rate list main...or chun ke kaha kar do recharge... BHAI ne mana kar diya..or MTS care walon se baat kara di..unhone kaha..aapko nahin pata kya... ye aapke wale offer pe to sirf 895 wala ya usse uoopar wala recharge hi hoga..usse kam ka nahin... maine apni GANIT ko ek baar fir kosa...or socha humne sifar yani 0 khoja tha... or har baar kuch bhi kar lo....aata humare haath bhi bada sa 0 hi hai... aur apni budhdhimataa kaa parichay dete hue..dukandar se kahan IDEA ka recharge kar do 98 wala..1gb for 1 month..taki MTS walon se badla le sakun..

MERA bholapan dekh kar shayad oopar baithe BHOLENATH bhi SAPARIWAAR hans diye honge.. khair...usne bhi kar diya IDEA pe recharge or humne bhi ghar jake mumyji ka phone hathiya liya or internet ka istemal hone laga..ab Saala FACEBOOk ke zariye hi sahi doston se vicharon ka aadan pradan ho leta hai.. or thodi bohot aap log prashansha kar dete hain..kalakaar ka man prasann ho jaata hai..or neend achchi aati hai.. lekin SARKAR maine aapko pehle hi kaha tha..ke har company kee service or product SHAADI ki tarah hoti hai....yahan bh jaise hi mera HMT yani HONEY MOON TIME khatm hua... aa gaye ye bhi aate daal pe... 1 mahina khatm hone se pehle hi khatm hogaya 1 GB...is baar humne HAR BOOND nichod daala tha I se Idea ke I se Internet ka... lekin jaise hi use recharge karwaya..ho gayi PANAUTI shuru... Shani kee sadhesaati chal rahi hai meri..

INTERNET NAHIN CHALA MERA.... fir shuru ho gayi jang... mera khoon khaul gaya... saala aise nahin chalega..maine idea care milaya...nahin mila..kyunki prepaid main balance nahin tha.. PAPA ka idea postpaid liya aur kar di CHADHAYI... lekin ek galati kar di...ke paramparanusar DAHI CHEENI NAHIN KHAYI... aur na jane ye baat Abhishek or Aditya ke Idea cutomer care walon ko kaise pata chal gayi... unhone.. kar diya OFFICE-OFFICE shuru..khair phone milaya..sun-dec-2011-09:15pm par...kisi RAVI naam ke executive ne uthaya..maine bade hi prem se use apni vyatha sunaye..usne bhi saari pareshani sun kar...GEETA SAAR ki tarah mujhe gyan diya..ke ye postpaid dept hai aap prepaid pe call keejiye... maine use kaha..ke bhaiya usme balance nahin hai isi se trfr kar do..paise to mere hi lagenge..par ye jo CUSTOMER CARE wale hote hain... inhe TAALIBAANI training di jaati hai... aap kuch bhi keh lo.. ye purane record kee tarah wahe line repeat karenge... ISE KEHTE HAIN BHARTEEYA HONE KA NUKSAN... saala jab main IBM main tha... to USA se Agrez phone karte the.. kanon main beep hota  tha.. or hum chillate they.. Thankyou for calling HP total care..how may i help you?.. or uske baad use chahe jo pareshani ho..uska theka humara... unko NA na NIKLE.. or yahan... saala.. humare paison pe humari hi call trfr tak nahin kee jaati..khair maine bhi apne tajurbe ka istemal karte hue..usse ek adad SUPERVISOR ko call trfr karne ki baat kahin..usne apna wahi SOOP CALL PROCEDURE NIPTAYA..or mujhe ABHISHEK ke ...INDIA KO 3G pe BEEJEE..wale social message pe chodd kar chal basa... wo isliye ke wo aaya 8 min baad... maine uske SUPERVISOR RAHUL se hold protocol poocha..to usne kaha 30 sec ka hold timing hai..maine bataya ke 8 min ho gaye tange tange...to usne bhi apne rutbe ka raub jhadte hue kaha..ke sir SUPERVISOR call transfer hui hai..to itna time to lagega.. maine use choti si 5ml wali jhaad lagayi or kahani repeat kee. or usne meri call transfer karne kee zehmat utha hi li...

Ab mujhe laga ke beta Pankaj tere PAAPON ka Prayashchit ho chuka bete..ab PREPAID wale tujhe wardan denge..call pahunchi UDAY naam ke ek bande pe..usne..mujhe chaata..kaata..or fir phenta.. kai baar tarkaya..par main bhi lohe ka chan tha..jo uski naak main ja ghusa tha.. 25 min kee jung  ke baad usse bh maine  SUPERVISPR MAANG hi liya.. usne to pehle 2 baar mana hi kar diya directly.. ab bolo kya karoge.. lekin main ADIYAL TATTOO... maine bhi haar nahin maani..or aakhirkaar usne RAJ naam ke apne TEAM LEADER ko call thama di.. ab tak dimaag ke parkhacche ud chuke the... maine use sankshep main bataya.. shikayat kee.. usne kaha complaint hum nahin darj kar sakte.. he bhagwan..ye sirf humare desh main hi ho sakta hai.. ke angrezon ke liye alag protocol or humare liye ulat...usne mujhe NIRBHEEK hokar kaha..ke complaint humare NODAL officer ko kar lo...or no. diya... nodal officer-9891905888- shalini dhingra...ka... maine poocha bhai abhi milega..usne raat ke 10:20 pe bhi kaha ke han..or call bina kuch pooche GPRS walon ko dhakel di.. jo kabhi nahin lagi...maine uske bad kai baar 198 pe caal kiya..lekin unka to server hi DOWN tha...4 ghante yani raat ke 2 baje complaint darj hogi bol ke unhone mujh gareeb ka call 5 baar kaat diya..

mujhe office jaana tha... so maine bhi apna latka hua munh theek kiya...dimag ki disco lights band kee..or apne aapko..Abhishek bachchan ko.. Aditya birla ko... kosta hua office chal diya....

ye sirf humare desh main hi ho sakta hai.,,....ke ek private sector kee company... apne customers ko satisfaction ki jagah... SATI..INFECTION de rahi ho... kuch bhi kar lo.. hum naihn sudhrenge... aage kya hua.. kal bataunga... AAJ TO ABHISHEK KE 3G PE BG..ne dukhiiiiii kar diya ....